Lentedag laat my altyd met ’n gevoel van melancholie

Lentedag laat my altyd met ’n gevoel van melancholie wat ek net nie kan afskud nie. Niks sentimenteel nie. Dit gaan oor die weersomstandighede: die koue temperature, die snerpende wind, die futlose ou sonnetjie … ek het al tot vervelens toe hieroor gekerm in vorige blogs¹2015 ’n Soete Lentedag²2016 Dis heerlike lente, die winter’s verby ³2017 Hol-la-dri-o-ha, hol-la-dri-o⁴2019 Perfekte alibi vir niksdoen. Die afgelope vier jaar het ek dus maar gemaak asof Lentedag nie bestaan nie.

Tradisioneel het ons mos nog altyd Lentedag gevier op 1 September. Hierdie jaar het ek besluit om die astronomiese aanwysings te volg en Lentedag te vier op 23 September. Google sê:

Vandag is dus Lentedag hier by my huis en gelukkig het ek ’n foto van ons pragtige amarillablom om te bewys dis lente. Natuurlik is dit nog steeds koud, die wind waai en die sonnetjie het geen fut nie, maar nou ja 🙄

Hier by die Laer Suidkus van Natal waar duisende mense van ander provinsies gereeld heen stroom om “vakansie by die see” te hou, ervaar ons nie regtig lente nie. Ook nie herfs nie. Hier is net twee seisoene: blêrrie koud en blêrrie warm. Ordentlikheidshalwe noem ons dit winter en somer. Daar is nog twee sulke halfwas “seisoene” wat ek dalk ook moet noem: die reënseisoen wat gewoonlik gedurende die blêrrie warm periode voorkom, maar soms tred verloor met tyd om ons bibbernat en verwese te laat in die blêrrie koue seisoen ook, en dan die windseisoen wat die oumense die “Augustus-winde” genoem het, maar wat in hierdie omtes strek van 1 Julie tot 15 Januarie. Sodra die skole oopmaak vir die nuwe skooljaar, ± 15 Januarie, en die vakansieseisoen amptelik verby is, breek die heerlikste strandweer aan.

Dis natuurlik net die walvisse en die Vaalies wat dink die beste seisoen hier rond is gedurende die Junie-/Julie -skoolvakansie. Die walvisse is koudbloedig en die Vaalies weet nie van beter nie.

Selfs ons plantegroei help nie veel met die onderskeid nie. Ons plante is feitlik deur die bank immergroen, soms minder groen, soms ’n stowwerige groen, maar darem altyd groen. As jy nou weet waarvoor om te kyk, sal jy oplet na die winter-blomseisoen wanneer die koraalboom, frangipani, alwyn, hibiscus, Brasiliaanse peperboom en Australiese sambreelboom vroliker lyk as gewoonlik. In die somer blom hulle steeds, maar dan sien jy ook verskillende soorte lelies, jasmyn, Yesterday, Today and Tomorrow en varkore wat meer baldadig is as gewoonlik.

Hierdie was (is) ’n besondere blêrrie koue winter, een wat jy slegs kan oorleef met warm winterspajamas wat jy dag en nag kan dra. Dis ’n eerste vir my. Gewoonlik slaap ek in kort pajamas in die winter en deur die dag trek ek sweetpakke aan. Hierdie winter trek ek steeds sweetpakke of jeans met ’n dik trui daarby aan … bo-oor my langmoupajamas. Ek loop rond met ’n paar fong kong Ugg stewels wat ek in die huis en buite in die straat dra saam met dik wolsokkies. Ons weet almal dat dit eintlik pantoffels is, maar ons gaan almal Pick n Pay toe met ons stewels. Selfs op Lentedag. Enniehoe, ek wou maar net gesê het dat ek een en almal ’n lieflike Lentedag toewens.

En natuurlik wou ek met die blom spog. Dankie vir die foto Oudste.

Geniet die dag.

Footnotes

• 1
  2015 ’n Soete Lentedag
• 2
  2016 Dis heerlike lente, die winter’s verby
• 3
  2017 Hol-la-dri-o-ha, hol-la-dri-o
• 4
  2019 Perfekte alibi vir niksdoen