Kuier-safari: op ‘n Google-toer deur Pretoria se strate

Ek het in 1971 in Pretoria aangekom en ‘n kamer gehuur in die Jeugtuiste in Sunnyside, ‘n hostel vir enkellopers wat deur die NG Kerk bedryf is. Ek het gekatikiseer en is in die Harmoniegemeente gedoop op 21-jarige leeftyd. 

Dis ook waar ek my man ontmoet het. Die klomp jongmans het elke middag met huistoegaantyd voor op die grasperk versamel om die “talent” deur te kyk. Ek het een middag van die werk af gekom en ‘n outjie gesien wat ewe windgat met ‘n groterige molslang gestaan en speel het. Enigiets om aandag te trek! Synde ‘n Namakwalander het ek die slang onmiddellik herken vir wat dit is en vir Mollie so in die verbygaan by hom gevat en met haar aangestap. As ek toe geweet het wat ek nou weet, het ek nooit aan sy slang geraak nie. O, dit klink vreeslik! Maar jy weet wat ek bedoel.

Toevallig het hy gestaan en gesels met ‘n vorige boyfriend uit my studentedae en sommer terloops vir hom gesê dat hy met daardie meisie gaan trou. Gewese boyfriend het hom uitgelag en hom vir ‘n bottel brandewyn gewed dat ek nie sou belangstel nie. Op dié manier is ek gewen vir die prys van ‘n bottel brandewyn en ek word gereeld daaraan herinner.

Enniehoe, ons is vier jaar later getroud in die NG Kerk Burgerspark. Beide die Burgerspark- en Harmonie-gemeentes is iewers in die jare ’80 – ’90 ingelyf by ‘n groter gemeente. 

Al ons troufotos is geneem in die pragtige Burgerspark, ‘n botaniese tuin in die hartjie van die stad wat 4 hektaar beslaan en as ‘n nasionale monument verklaar is.

Ons het ‘n hanetree van die park af gewoon en ek het soggens werk toe gestap na wat toe nog bekend was Barclays Nasionale Bank (nou Eerste Nasionale Bank). Op pad werk toe het ek verby Strijdomplein geloop en my verwonder aan die pragtige struktuur wat op 31 Mei 2001 (die 40ste verjaardag van Suid-Afrika se Republiekwording) tot niet gegaan het toe die ondergrondse parkeerterrein waarop die monument gebou was, inmekaargestort het.

Ons gebou was op die rand van Kerkplein, waar President Kruger toe reeds al oor die stad uitgetuur het, maar ek sien dat die standbeelde nou palisades om het. Toe ek daar gewerk het, het ons menige etensuur daar in Oom Paul se skaduwee gesit en ons middagbroodjies geëet. Dan het ons die minirokkies mooi kuis afgetrek en lang sigarette gerook terwyl ons gedroom het oor die res van ons lewens wat nog voorlê.

Ons het lekker tye deurgebring in Burgerspark, Fonteinedal (‘n 60 hektaar natuurreservaat by die suidelike ingang na Pretoria) en op die walle van die Apiesrivier wat deur Fonteinedal en ook net agter ons woonstelgebou verbygevloei het. Andersins het ons tyd verwyl in die inryteaters in Zwartkoppies, Lynnwood en Fonteinedal waar ons soms beide die vroeë en laat sessies bygewoon het. O en moenie vergeet van die “sopkombuise” nie – niks te doen met vandag se eetplekke vir mindergegoede burgers nie – dit was teaters waar jy heeldag flieks kon kyk vir ‘n minimale bedrag. Wanneer ons geld gehad het (slegs op betaaldag 😉) het ons groot steaks gaan eet by Billy’s Village in Sunnyside. Die Uniegebou, destyds in sy volle glorie met die pragtigste roostuine denkbaar, was die verkose vryplek vir al wat leef en beef en hormone had.

Pretoria was ‘n pragtige stad, skoon en netjies en ‘n droomfantasie gedurende September / Oktober wanneer die pers Jakarandabome in volle bloei was. Wat ‘n pragtige gesig, maar het julle geweet dat, alhoewel Pretoria die Jakarandastad genoem word, daar baie meer Jakarandabome in Johannesburg is?

Ons eerste seun is 40 jaar gelede gebore in die Marifont Hospitaal in Pretoria en ‘n jaar daarna is sy boetie gebore in die Moedersbond, maar toe het ons reeds ‘n huis gekoop in Pierre van Ryneveld en ek het kort daarna in die destydse Verwoerdburg begin werk.

As daar nog bloggers is wat rondkuier in Pretoria saam met die Toerende Towerinne (lesers ingesluit) en graag iets wil vertel oor hierdie stad, streek of provinsie, moenie vergeet om julle bydraes oor hierdie onderwerp te skakel op InLinkz nie! Die skakel is http://www.inlinkz.com/new/view.php?id=797928.

Featured photo credit By JMK [GFDL (http://www.gnu.org/copyleft/fdl.html) or CC BY-SA 3.0 (https://creativecommons.org/licenses/by-sa/3.0)], from Wikimedia Commons.