Lê-Jou Eier-kuier-safari: Spring op die bus

Ons nuwe bloguitdaging is ‘n kuier-safari, voorgestel deur Una, en bloggers mag dit nie mis nie!

Net voordat ons Una se plan bespreek, wil ek graag al die deelnemers aan die Nellie-sage bedank vir hulle deelname. Nellie … ek kan net my kop skud oor haar; dit was ‘n karakter duisend. Sy gaan toe sommer van arm familielid op die plaas tot ‘n rol in ‘n film en daar ontwikkel toe ‘n spin-off – AJ se Nellie is deurmekaar met diamanthandelaars of diamantsmokkelaars, ek kan nie besluit presies wat hulle is nie.

KUIER-SAFARI:

Una het gedink dat dit hoog tyd is vir bloggers om op ‘n virtuele kuiertoer te gaan en ‘n dag of twee by elke blogger oor te bly. Vir hierdie doel het sy ‘n toerbus gaan huur. Die toer gaan sò werk:

1. Alle bloggers gaan saam in die (virtuele) toerbus ry van een bestemming tot die volgende, totdat elke gasblogger die geleentheid gehad het om die groep te onthaal en ‘n blog te skryf oor wat alles plaasgevind het gedurende die kuier.
2. Elke gasblogger:
   1. moet al die bloggers wat deelneem vir twee dae en een nag lank onthaal in sy / haar omgewing (stad, dorp, plaas of waar ookal die gasblogger woon). Dit moet ‘n plek in Suid-Afrika wees. As ons Saffers deelneem (en ons hoop julle sal), moet julle asseblief Suid-Afrika toe kom en ons hier kom onthaal by julle familie of vorige verblyfplekke.
   2. moet verblyf reël vir almal en sorg dat almal gevoed word vir daardie tydperk (goeie advertensie vir jou dorp en vir diegene wat ‘n gastehuis besit!).
   3. moet sorg vir ‘n interessante uitstappie (gaan kyk na ‘n besienswaardigheid, gaan pluk die appelboorde, gaan ry in ‘n lugballon, gaan teater toe, neem deel aan atletiekdag), maar dit moet iets wees wat werklik bestaan in die gasblogger se omgewing. Ons wil graag die plekke leer ken. Fotos sal dus welkom wees.
   4. Wanneer die virtuele kuier verby is, moet die gasblogger ‘n blog skryf en vertel wat die bloggers aangevang het.
3. Die bloggers wat gekuier het, sal natuurlik kommentaar lewer op die blog (hoe dan anders? hulle moet mos hulle wangedrag of blapse verdedig!). Hulle is natuurlik ook welkom om ‘n opvolgblog te skryf oor die kuier, of om ander herinneringe op te roep of ‘n storie te vertel oor die plek waar hulle gekuier het. Dit sal interessant wees om die gasblogger se omgewing uit die penne van verskillende bloggers ook te leer ken en dalk hulle fotos ook te sien. Las alle verwante blogs aan op die InLinkz skakel  http://www.inlinkz.com/new/view.php?id=797928..

Die reëls:

Bespreek jou plek op ons toerbus vir die kuier-safari.

Ons gaan weer gebruik maak van ‘n Google-vorm om in te skryf. SKRYF ASSEBLIEF IN VOOR DONDERDAG 13 SEPTEMBER 2018. (Opdatering 2018.09.13 – die inskrywings is nou gesluit).

Kliek op die “inskryfvorm” knoppie onder hierdie blogpos en vul die naam van jou blog en die URL in, asook die naam van die plek waar jy bly. As jy op ‘n plaas in die doertes bly en jy wil nie te veel verklap oor jou adres nie, gee net die naam van die naaste groot stad of dorp. Die rede hiervoor is dat ons ‘n kaart en ‘n reisplan wil optrek sodat ons die datums kan bepaal waarop elke gasblogger sy blog moet plaas.

Wanneer almal klaar ingeskryf het, sal ons datums invoeg waarop die gasbloggers hulle blogs moet plaas (dit sal elke week op ‘n Donderdag wees). Hou dus die skakel dop vir die lys van deelnemers  en die datums waarop hulle moet skryf (kliek op die knoppie “deelnemers” onder hierdie blogpos).

Una sal eerste afskop en sy gaan ons almal by O R Tambo Lughawe ontmoet op Vrydag 14 September om by haar te kuier. Sy sal haar blog plaas op Donderdag, 20 September en die InLinkz-skakel bekend maak. Sy sal ook die kaart plaas om te wys hoe ons gaan toer.

Hierdie keer gaan die bloggers dus genoeg tyd gegun word om hulle blogs voor te berei. Dis nie ‘n vervolgverhaal met ‘n storielyn nie. Julle kan solank begin werk aan idees van hoe om mede-bloggers te onthaal en julle blogs begin skryf. Ons hoop dat almal lekker gaan saamspeel.