Lê-Jou-Eier: Die Voortvlugtiges – ‘n vervolg op Die Perfekte Misdaad

Die Voortvlugtiges is die volgende vervolgverhaal wat die bloggers gaan aanpak vir ons Lê-Jou-Eier uitdaging. Dit is ‘n opvolg op ons boek Die Perfekte Misdaad wat afgelaai kan word by hierdie skakel BookTalk in PDF, MOBI, en EPUB formaat.

Nou moet ek eers julle aandag vestig op die die laaste hoofstuk van Die Perfekte Misdaad waarin Hester (dis nou ek), vertel het hoe ek en Carlos weg is van Toweropstal. Ons was mos op pad Las Vegas toe sodat ek vir Carlos kan terugbesorg by sy pa en ook om my persoonlike lyfwag (Una se nefie) by die blackjacktafels te gaan wegsleep, terug Suid-Afrika toe.

Ons het skaars by die casino se deure ingestap, toe sien Pablo (Carlos se pa) ons en hy storm op ons af. My persoonlike lyfwag het blykbaar ook die deur dopgehou, want hy kom daar aangehol teen ‘n vet spoed, vuiste gebal om my te kom verdedig. Hy haak daar af en slaat ‘n hou met sy regtervuis wat vir Pablo met ‘n myl mis, maar my reg op die punt van my ken tref. Ek het net sterre gesien en uitgepaas.

Toe ek weer wakker word, sit ons almal in Pablo se private vliegtuig, op pad Colombia toe. Pablo babbel aanmekaar met my en my lyfwag sit en huil. Pablo se Engels is maar skeef en krom en van Spaans verstaan ek geen snars nie, maar Carlos kon darem toe verduidelik dat sy pa my lyfwag oor sy skoot getrek en hom ‘n helse pak slae gegee het, net daar in die casino, omdat hy aan ‘n dame geslaan het.

Ek voel nou so sleg oor alles wat gebeur het, want ek het ook gedink Pablo gaan my vermorsel. Ek het mos vir Carlos ‘n snotklap gegee omdat hy in my bed gerook het en ons het nie tyd gehad om sy voortande te laat regmaak nie. Toe kry die arme nefie die pak slae van sy lewe net omdat Pablo so bly was om sy seun te sien en hom wou omhels.

Pablo het ons sonder sonder seremonie in sy vliegtuig gelaai en ons Colombia toe gebring sodat sy persoonlike arts na ons kom omsien. Dis nou hoe ek hier in die private vleuel van die hospitaal opgeëindig het. Pablo vra nog steeds om verskoning en bring elke dag vir my blomme en tjoklits. Die nefie eet maar die tjoklits, want ek kan mos nog nie kou nie.

Maar om nou terug te kom by die Toweropstal: met die vertrek daarvandaan het ek en Carlos ‘n hele konvooi polisiekarre teëgekom daar in die grondpad. Siende dat die karre se ligte en sirenes nie aan was nie, het ons gedink dat hulle op pad is na een van Toortsie se polisiepaarties toe daar by die opstal.

Dis nou eers toe ek my whatsapp-boodskappe begin lees het hier in my hospitaalbed, dat ek hoor die ligte en sirenes het wel aangegaan toe die polisiekarre net so digby die opstal was … maar ek gaan die misdadigers vra om die verhaal verder te vertel.

Lekkervurig is eerste aan die beurt en sal môre of oormôre die volgende aflewering plaas. Kyk uit vir haar blog – ons gaan aan haar lippe hang.

Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, klik op die paddatjie of die InLinkz skakel net daaronder:

http://www.inlinkz.com/new/view.php?id=769965

Vir die reëls van hierdie eier-boerdery, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke. Onder hierdie kategorie, kyk na die blogposte Lê-Jou-Eier: Reëls (2017-08-22) en Lê-Jou-Eier: Hoe neem ek deel? (2017-08-22).