Die Ingelse muntstuk neem ons op toweragtige reise

“Hulle” sê altyd geld is die wortel van alle kwaad, maar in die hande van ‘n Towerin is ‘n blink Ingelse muntstuk ‘n towertapyt wat wonderbaarlike reise tot gevolg het.

Hierdie reisjoernaal begin op die oomblik waarop die Towerinne neergedaal het uit die ruimte, waar hulle ‘n paar uur lank rondgesweef het in ‘n tent gevul met heliumbalonne. Raar maar waar. Vuurvliegie het daarin geslaag om die tent veilig terug aarde toe te bring en te laat land op die dorpsmeent van Rebusfontein. Die (effe rowwe) landing het veroorsaak dat Sonell se Ingelse muntstuk uit haar sak geglip en in Bondelsgedagtes se cleavage beland het.

Bondels, soos alle Towerinne, is geslaan met die gawe van opperste nuuskierigheid, avontuurlustigheid en ‘n goeie skoot impulsiwiteit. Sonder om te huiwer, het sy die muntstuk opgediep uit haar cleavage en dit gevryf soos wat sy Sonell sien doen het om tydskering toe te pas. Dit doen jy deur oor die afdruk van die Koningin se NEUS te vryf.

Die muntstuk kan egter ook jou dagdrome oor verre lande, tye en plekke bewaarheid wanneer jy oor die rooi merk van die Koningin se KROON vryf. Dan word jy en jou reisgenote afgelaai op enige deel van die wêreld of ander planeet (bestaande of nie-bestaande) en in enige tydsgleuf (verlede, hede of toekoms), waaroor jy al ooit gedroom het. Dus kan die Towerinne reis waarheen hulle wil en ongerymdhede gaan pleeg op enige tydstip wat deur hulle verbeelding bereik kan word.

Dis presies wat gebeur het toe Bondels die muntstuk gevryf het … maar sy sal self vertel wat gebeur het.

Una het vorendag gekom met die idee van fantasiereise – dankie Una dat jy jou verbeelding met ons deel.

Hierdie is nog ‘n Lê-Jou-Eier bloguitdaging wat deel vorm van die Towerinne se avonture. Skryf in vir hierdie uitdaging deur ons inskrywingsvorm op Google Docs te voltooi. Bloggers sal skryf in die volgorde waarin hulle inskryf – kyk na HIERDIE vorm (spreadsheet) wat outomaties op datum gehou word om te sien wanneer dit jou beurt is om te skrywe en heg jou bydrae aan op ons InLinkz-skakel:

https://fresh.inlinkz.com/p/935a80f8f1d64f4f8f4a491bb1abb030

Kom reis gerus saam met ons en as jy graag die muntstuk wil vryf om aan die avontuur deel te neem en ‘n episode te skryf, skryf gerus in. Hierdie uitnodiging is oop vir alle bloggers op alle platforms – ons soek altyd “nuwe bloed” om deel te neem aan ons uitdagings. As jy in Afrikaans skryf, sluit gerus aan by die Towerinne en neem deel aan hulle avonture. As jy nog nooit deelgeneem het aan een van ons uitdagings nie, besoek die volgende skakels Lê-Jou-Eier: Reëls en Lê-Jou-Eier: Hoe neem ek deel? Laasgenoemde blogpos bevat ook al die onderwerpe en skakels na vorige uitdagings.