My kinders het kokerboom-koors opgedoen

Die plan was om Dinsdag te ry tot in die Kamiesberge, waar ons ingeboek was in akkommodasie net buite Kamieskroon. Ons is vroegoggend weg uit Die Posmeester se huisie daar in Citrusdal.

Terug op die N7 kon ons sien dat daar heelwat blomme in die veld was, maar die hulle het nog nie oopgemaak nie. Die beste tyd om blomme te kyk is tussen 11:00 en 15:00. Nader aan Vanrhynsdorp, net voor 11:00, het ons ’n bietjie verpoos en in die veld rondgeloop om die geel madeliefies van naderby te beskou.

In Vanrhynsdorp het ons besluit om iewers koffie te gaan drink. Vlakby die ingang van die N7 tot in die dorp het ons twee pragtige kokerbome gesien (foto heel bo). As ek moes skat, sou ek sê hulle is naby aan ’n eeu oud en baie indrukwekkend. En toe kon dit nie hoër of laer nie, ons moes eers die bekende Kokerboom Kwekery gaan besoek. Vergeet van koffie en ontbyt, daar is eetgoed in die motor.

“Ek ry nie weer met ’n kokerboom op my skoot rond nie,” waarsku ek, gedagtig aan ons blommetoer in 2010 toe ons van hierdie einste kwekery af ’n kokerboompie per bus en per trein vervoer het tot in Gauteng. Maar ek het nie nodig gehad om my te bekommer nie – hierdie kwekery stuur deesdae sommer jou bome per koerier aan. Toe ek weer sien, word kredietkaarte uitgepluk en elke spruit het twee kokerbome aangeskaf. Oudste wil ook nou toetree tot die kokerboomgarde en dis oukei met my. Sy twee gaan Johannesburg toe.

Maar wat nou Karen, ons hét dan reeds twee kokerbome wat ek as geskenk vir Moedersdag gekry het daar in KZN? Maar ma verstaan nie, hulle verkoop twee soorte kokerbome hier – die gewone Namakwalander en dan die kruising tussen die Namakwalandse kokerboom (aloidendron dichotoma) wat een kroon het, en die Namibiese kokerboom (aloidendron ramosissima) wat meer as een kroon vorm. En ons wil mos albei hê. Wil ons? 😏Toe ek laas gekyk het, het ons in ’n huis gewoon met bykans geen tuin nie. Ja, maar ma verstaan nie, hulle kan jare lank in potte groei, want hulle groei so stadig. O. Nee dis oukei, dit lyk asof ma (’n gebore en getoë Namakwalander) nie altyd meer so goed van begrip is nie, maar ma is ook nie die een wat die potte gaan ronddra nie, so gaan maar voort. En net vir jou inligting, ek ken ook die verskil tussen die twee soorte – die Namakwalander groei regop soos ’n boom en die Namibiër wat algemeen is in die Richtersveld daar bo teen die grens van Namibië, maak meer van ’n bos. En ek weet hoe stadig hulle groei. Tsk.

By die winkeltjie koop hulle vir hulle ma ’n paar potjies jam. As ma begin vrae vra, koop jy vir haar ingelegde groenvye, fyn vye-konfyt en makataanstukke. Dit hou haar gelukkig. Dis nou 12:00 en ma is ietwat honger, so dalk kan ons nou daardie koffie en iets te ete gaan kry? Toe nie, maar ek vertel later meer.