Liewe Dagboek, dis Kersfees 2022 en die jaar is amper verby 1️⃣6️⃣

Ek kan nie glo dis reeds Kersfees nie.

Karen het oudergewoonte aan die einde van November al die Kersfees-liggies uitgepak en dit stelselmatig begin opsit. Ons het besluit om die tradisie voort te sit en die liggies te laat brand, ten spyte van verlies en teëspoed. Waar daar lig (en elektrisiteit) is, is daar hoop, en kinders wat die skouspel geniet. Ek weet ook nie, soms lyk dit asof die grootmense dit meer geniet … 🤔

Waar daar Kersfees is, is daar koekstruif (“trifle“) wat ook ’n jarelange tradisie in die familie is. Ons het weer die klein kombuisie se werk-oppervlakte vol soetigheid gepak, asook die kwart bottel brandewyn wat hierdie jaar sy derde verjaardag vier in my kombuiskas. Die bure het bygedra en gehelp om die struif te maak. Dis tradisie om koekstruif te maak en ook daarvan weg te gee. Die Beurtkat het gesien die boksie met die lekker soet melk (vla) word uitgepak en het kort-kort aangemeld vir ’n lekkie daarvan in sy bakkie.

Ons het jare gelede al weggedoen met die tradisie van Kersgeskenkies, behalwe vir die Beurtkat wat ’n Kerskous het en spesiale behandeling ontvang. Ons gee en ontvang wel eetgoed en die kaste is vol koekies en lekker eetgoed.

Ons kan nooit besluit watter soort maaltyd ons wil eet vir Kersfees nie – dit reën gewoonlik op hierdie dag en ons kan nie braai soos in die “ou dae” daar in Gauteng nie. Ons eet nie graag uit in besige restaurante nie en hou nie van take-aways nie. Buitendien is dit ook tradisie om “so min as moontlik” te doen op Kersdag en ons eindig gewoonlik op met ’n vinnig saamgeflanste maaltyd voor die TV. En koekstruif. Middagslapies in in orde enige tyd van elfuur in die oggend af.

Ons wens graag vandag al ons vriende en familie ’n geseënde Kersfees toe. Koester julle geliefdes en maak mooi herinneringe. Dankie vir die liefde en ondersteuning wat ons ontvang het gedurende swaar tye, en die vriendskappe wat her-smee en vaster getrek is. Geniet die dag.