Maatreëls wat nog nagekom moet word in my teenwoordigheid

Na aanleiding van die Suid-Afrikaanse Minister van Gesondheid, Joe Phaahla, se aankondiging gister dat covid-maatreëls herroep is.

Let asseblief op dat ek verwag dat mense die volgende maatreëls steeds moet nakom in my teenwoordigheid:

• Behou asseblief die ruimtelike afstand tussen ons. Ek haat dit as mense in my nek asemhaal. Dit was een van die beter maatreëls wat ingestel is, destyds.
• Moenie daarop aandring om my te soen of met die hand te groet nie. Ek is nooit só bly om jou te sien nie.
• Borsel asseblief jou tande en gebruik mondspoelmiddel voordat jy die huis verlaat. Sweetweermiddels werk ook vir my, as bykomende maatreël.
• Sorg asseblief dat jy jou valstande dra in die openbaar. Ek weet dis moeilik, maar ons sal maar almal weer gewoond moet raak daaraan.
• Haal daai norse uitdrukking van jou gesig af en glimlag, dit maak my dag sommer mooier as ek elke nou en dan skoongeskropte wit tande sien blink.
• Jy het nou geen rede meer om so te mompel dat ek jou nie kan hoor nie. Kyk my in die oë en praat mooi duidelik sodat ek uiteindelik ook weer kan hoor na twee jaar van pynlike gesukkel om gesprekke te volg.
• Was jou hande. Gereeld. Dis net goeie maniere om nie met vuil hande aan alles te vat nie. Dit was ook een van die verstandige maatreëls.
• Mag ek asseblief die finansiële instansies mooi vra om voort te gaan om hulle OTM’s se sleutelborde so nou en dan skoon te maak? Ek verpes dit as my vingers vassit aan taai sleutels.
• Ek versoek dieselfde van winkels en ander openbare besigheidsplekke – hou daardie toonbanke en vloere skoon.
• Hierdie is nie ‘n carte blanche ekskuus vir mense om weer op straat te begin spoeg nie. Of op sportvelde nie. Sies man! Dis ‘n lelike gewoonte.
• Hou jou hand voor jou mond (of dra ‘n masker) wanneer jy hoes, nies en proes. Covid is nie die enigste kieme waarvoor ons bang is nie.
• Ek wil nog steeds nie jou babatjie vashou of soen nie. Ook nie jou hondjie nie.
• Jy kan maar op die stoel langs my sit, maar dis nie nodig dat jy jou liggaamsdele so laat uitsprei dat ons skouer-aan-skouer en dy-teen-dy moet sit nie. Daar is genoeg plek vir almal van ons.
• Nee dankie, ek wil nie jou lip-ice deel of saam met jou uit dieselfde waterbottel drink nie.
• Moenie jou kar by die verkeersligte staan en rev nie. Asseblief. Dit stink.

Jy weet, noudat ek die saak oordink, meen ek tog dat ek maar die boks maskers wat ek gekoop het nog ‘n rukkie moet dra. Dit was ‘n veilige skans tussen my en die res van die wêreld.