#Woordwarrel 18 November 2021 swartskaap

Vandeesweek speel ons letterkeer of anagram en die inspirasievonk is swartskaap. Vandag voel ek meer soos ‘n agteros op pad kraal toe, want my medeskrywers Perdebytjie, Lekkervurige Affêre en Kameel:

het al die moontlike woorde geannekseer met raap en skraap

sowaar as vet alles bymekaargegooi van Noordwes tot Kaap

vir my oorgelos die droesem in die beker, die onderste kwart

en hier bly staan ek, skapie wat wei in die park, alleen en apart😜

Ek moet nou eers diep nadink oor die woord swartskaap. 🎶Baba swartskaap, het jy vir my wol? Ja Meneer, Ja Mevrou, drie sakke vol. 🎶 Mmm, nie veel wat ek daarmee kan doen nie en hierdie skapie is net … swart. Swartskaap moet ‘n ander betekenis hê.

Dink. Die swartskaap in die familie of samelewing word gewoonlik blameer vir dade wat sosiaal onaanvaarbaar is. Dis hoe dit in die verlede gewerk het. Deesdae se swartskaap is mos die nuwe soort held. Hoe meer skokkend, buitensporig en ondeurdag die dade of die woorde wat by die mond uitvloei, hoe meer word die voormalige swartskaap verhef tot volksheld.

Nee man. ‘n Held is mos ‘n persoon wat vereer word vir sy liggaamlike en intellektuele krag, moed, dapperheid en bekwaamheid, nè? Nie vir sy kwaadwilligheid, listigheid, onbetroubaarheid, onderduimsheid, opsetlikheid, skynheiligheid, slinksheid, sluheid, skelmgeit en vuil bek nie, of hoe? Hoekom kry ek dan al hoe meer die indruk dat ons beskawing die tipiese anti-held, die protagonis wat ‘n uiterste gebrek toon aan die karaktertrekke wat van hom / haar ‘n held sou maak, tot godedom verhef?

Dalk dink ek te diep. Wie onthou nog die boeke wat die gewilde skrywers, Elmar Steyn o.a., geskryf het? Die verhale waarin die boekanier (perdedief, wilddief, seerower), kaartbedrieër en struikrower verhef is tot kavalier … en held? Hierdie “helde” was ook meesal eintlik swartskape, gewoonlik wat die Britte ‘n Remittance Man sou noem. Dis die swartskaap wat vanweë sy onaanvaarbare gedrag deur sy hogere familie weggestuur word na vreemde lande om sy eie potjie te gaan krap, met ‘n jammerlike klein geldelike maandelikse bydrae wat sy familie aangestuur het daar van ou Ingeland of Frankryk af. ‘n “Remittance” het hulle dit genoem. Vandag sal dit ‘n elektroniese oorplasing wees.

Maar julle kan nie stry nie – hierdie kavaliers was sjarmant (en aantreklik) en hulle het geweet hoe om die Kaap se vroulike geslag om hulle pinkie te draai. Dit was nou wanneer hulle nie besig was om geld te steel by die rykes nie (natuurlik met die doel om dit à la Robin Hood aan die armes uit te deel, nie om huise in Sandton te gaan bou nie). Hulle was van gesiene families, goedgeleerd, baie manierlik, o so sjarmant en natuurlik só aantreklik. Net so ‘n bietjie aweregs, maar op ‘n manier wat jy kon vergewe (as jy ‘n hubare jongmeisie of die ma van ‘n hubare jongmeisie was). Sug. Ongelukkig het die storie altyd geëindig net ná die Groot Liefdesverklaring en was maar powere voorbereiding vir die werklikheid wat sou intree by die omruil van babadoeke, slapelose nagte oor onbetaalde rekenings, honger by gebrek aan iemand wat die landerye moet bewerk of skape oppas…. Vergelykbaar met die hofmakery en beloftes tydens ‘n verkiesingsveldtog.

Ag ja, die werklikheid lyk altyd bietjie anders.

Hierdie bloguitdaging word gesamentlik aangebied deur https://hesterleynel.co.za en https://lekkervurigeaffere.blog/.

Hoe dit werk:

Die aanbieders sal om die beurt elke Donderdag voor twaalfuur ‘n inspirasievonk in die vorm van ʼn spreuk, spreekwoord, gesegde, vreemde woord, of nuutskepping op haar blog plaas om die uitdaging af te skop.

Deelnemers word genooi om die vonk te gebruik en net eenvoudig te laat waai – gaan net daar waar die woordmuse en jou gedagtestrome jou lei in ’n malse maalkolk, in stroomversnellings, in stil waters of in ruisende valle, vlak of diep.

Daar is geen beperkinge op die tipe skryfsel wat jy wil pleeg nie. Skryf min woorde of baie, ‘n haikoe of enkelreël, opstel, gedig, resep of wat ook al die inspirasievonk losgeskop het in jou skrywersbrein.

Oopbek en loshande is die enigste reël.

• Publiseer jou bydrae voor of op die Sondag wat volg op die datum van die uitnodiging.
• Plaas die skakel van jou bydrae in die kommentaarblokkie (“comments section”) onderaan die blog waarin die inspirasievonk verskaf word om te verseker dat daar ‘n terugskakeling (“pingback”) na jou inskrywing sal wees wat deur ander lesers gevolg kan word.
• Jy mag dit makliker vind om die twee aanbieders se blogs te volg om te verseker dat jy nie die inspirasievonk vir die week misloop nie.
• Plaas gerus ‘n kopie van ons Woordwarrel-logo bo-aan of binne-in jou blog, sodat ander skrywers weet dat jou bydrae deel vorm van hierdie uitdaging.
• Gebruik die hutsmerke #Woordwarrel #Afrikaans

Laai waai en geniet dit.

Die plasing Woordwarrel Inspirasievonk 18 November 2021 het eerste verskyn in die blog Lekkervurigeaffere. Gaan skakel jou #Woordwarrel in die kommentare.