Woordsnoer bloguitdaging: ons kuier by familie

Ons kuier op hierdie lomerige Sondagmiddag oppie familieplaas by my oompie Sareltjie en antie Sienie. Twee regte ou fossiele. Hulle dateer albei uit die dae van die Groot Runderpes. Sê Pa. Ma se familie gaan mos nie sommer vanself dood nie – hulle moet met ’n langklip doodgeslaan word. Sê Pa.

Eweso Pa se familie, dink ek by my sigselwers, want daai kant leef daar ook nog ’n paar verdroogde pruimpies. Maar ek sê liewer niks, want Pa is kapabel en gee my ’n oorveeg.

Maar selfs ’n kanniedood soos oompie Sareltjie kan nie altyd ontsnap van die lewe se groeipyne nie. So nou en dan kry hy ook te doene met liggaamlike sorge, soos ’n ou verkouetjie. Hy lê vandag pens en pootjies in die bed. Pa het van sy beproefde doepa vir oompie Sareltjie ingejaag: ’n paar blertse Jamaikagemmer opgetop met Pa se selfgestookte witblits, en tjoklit peperment essens vir smaak. Hierdie medisyne is die sleutel tot ’n lang gesonde lewe. Sê Pa.

Ja, dis nou te sê as die mengsel hom nie nog boonop appelkoosmaag gee nie. Sê Ma.

Oompie Sareltjie was ’n aansienlike man in sy jongdae. Hy was ’n regte Adonis. Sê antie Sienie, waar sy sta’ en snoek smoor in die kombuis. Ek verwonder my aan die kalkoenvel onder haar arms wat dán links en dán regs wapper wanneer sy die mengsel in die pan met egalige hale omdraai.

Vir my lyk oompie Sareltjie meer soos ’n adoons. So met sy groterwordende kopvel wat sy yl haartjies wegja. Wanneer hy praat, wip iets wat lyk soos ’n tikseltjie swart Nugget op en af op sy bolip. My oompie praat graag oor die Tweede Wêreldoorlog. Sy heldedade. Sommer ’n klug, sê Pa. Oompie Sarel is alte ekkerig – en om te dink hy het die oorlog omgesit in ’n weduvrou se hoenderhok daar in Italië.

Ons beter huis kry, sê Ma. Lyk my sommige mense het hulleself ook gehelp aan die wonderdoepa.

Ek sê liewer niks. Kinders moet gesien en nie gehoor word nie.

Voordat iemand my wil braai: Oompie Sareltjie en antie Sienie is fiktiewe karakters. Die weduvrou in Italië ook. Daar was nie ’n familieplaas nie. My pa het nie witblits gestook nie. Of gedrink nie. Ek is nie disrespekvol teenoor ouderdom nie – ek is oud genoeg om te besef dat ouderdom net met humor besweer kan word.

En dit was Vuurvliegie se opdrag dat hierdie Woorsnoer bloguitdaging op humoristiese wyse aangepak moet word. Om die ander bloggers se bydraes te lees, besoek hierdie skakel: https://fresh.inlinkz.com/p/b4994a70bde246a8aca2b9b45ddb2193

Image by Clker-Free-Vector-Images from Pixabay