Die misterie van Rebusfontein se biblioteek

Hierdie bloguitdaging oor ’n biblioteek in ’n verwaarloosde en verlate 19de-eeuse herehuis net buite Rebusfontein, word aangebied deur Kameel. Die uitdaging sal ’n vervolgverhaal wees en ons gaan weer hope pret hê soos destyds by Toweropstal.

Dis duidelik dat die huidige verwaarloosde toestand van die herehuis en die biblioteek die nadraai is van misterieuse gebeure, maar die feite agter die storie is nie bekend nie. Daar sal wel leidrade verskaf word in elke hoofstuk.

My taak is net om die voornemende deelnemers in te lig dat hulle moet inskryf vir deelname. Sodoende hoef ons nie rond te val en vrywilligers te soek wat ons kan nomineer nie.

Hoe skryf jy in vir hierdie blogpret?

Doen die volgende: Klik op hierdie Google Doc aansoekvorm en gaan vul jou blogtuiste se naam en URL in. Druk die SUBMIT knoppie en daar sal ‘n skermpie verskyn met die bewoording “Your response has been recorded”. Al die inskrywings word outomaties en chronologies opgelaai na ’n Google Doc spreadsheet by hierdie skakel (skakel nou verwyder). Gaan kyk gerus of jou naam reg opgelaai het.

Hoe werk die nominasies?

Die bloggers gaan mekaar nomineer. Kameel gaan die eerste hoofstuk skryf en die eerste leidraad verskaf. Sy gaan ook in haar blog die volgende skrywer nomineer en verduidelik waar die volgende leidraad gevind kan word. Sy kan enige persoon op die lys nomineer. Sorg dus dat jy op die hoogte bly van die storie wat vertel word in die blogs sodat jy op enige punt die storie verder kan voer.

Die persoon wat deur Kameel genomineer is, skryf dan sy/haar bydrae en nomineer op sy/haar beurt die volgende skrywer, totdat elkeen ’n beurt gekry het om te skryf.

Wat doen ek terwyl ek wag om genomineer te word?

Lees die hoofstukke wat reeds geskryf is, lewer kommentaar, lug jou mening en help bespiegel oor die geskiedenis van die herehuis, asook die misterieuse gebeure wat die huis en biblioteek in so ’n verwaarloosde toestand gelaat het. Jou kommentaar kan dalk net die verloop van die verhaal beïnvloed!

Hoe moet ek die hoofstuk waarvoor ek genomineer is, aanpak?

Jy moet die drade van die storie optel vanaf die vorige bydraes wat reeds gepubliseer is. Kyk veral na die leidraad wat die nominerende blogger vir jou gelaat het en ontwikkel die storie verder. Jy mag twists en turns inbring, maar moet asseblief nie ’n relaas skryf wat die vorige bydraes ignoreer of die storie ongedaan maak nie.

BELANGRIK: maak seker dat jy in jou blog vir die volgende blogger aandui waar die volgende leidraad gevind kan word EN nomineer ‘n blogger van die lys af. Ons sal die lys op datum hou en bloggers wat klaar geskryf het, se name sal verwyder word.

ASSEBLIEF: Wag een volle dag voordat jy jou bydrae publiseer. Hierdie wagperiode is bedoel om lesers die kans te gun om die vorige bydraes te lees en kommentaar te lewer. Onthou dat die bloggers nie almal in Suid-Afrika woon nie en dus nie in dieselfde tydsones opereer nie. Respekteer asseblief elke deelnemende blogger se reg om ten minste ’n dag lank in die hitte van sy/haar “roem” te bak. MAAR, moenie te lank wag voordat jy jou bydrae publiseer nie, want ons wil nie graag hê dat die storie momentum verloor nie.

MOENIE: die laaste hoofstuk skryf sodat die storie oor en verby is voordat al die ingeskrewe bloggers hulle bydrae gelewer het nie. Ons sal verwikkelinge dophou en besluit wanneer dit tyd is om die laaste hoofstuk te skryf.

Mag ek meer as een bydrae lewer?

Ja, maar later eers wanneer almal reeds ’n beurt gehad het en mits die storie nog onklaar is. Ons sal die gang van sake dophou en vra dat diegene wat graag nog ’n bydrae wil lewer, weer die aansoekvorm voltooi.

Ons InLinkz skakel vir hierdie uitdaging is https://fresh.inlinkz.com/p/3f26291088494dc99c7aa4554a66a313

Skryf in vir die uitdaging so gou as moontlik. Die eerste hoofstuk word op die 19de September gepubliseer.

Bloggers wat nog nie voorheen deelgeneem het aan ons Lê-Jou-Eier bloguitdagings nie: Om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakels Lê-Jou-Eier: Reëls en Lê-Jou-Eier: Hoe neem ek deel? Laasgenoemde blogpos bevat ook al die onderwerpe en skakels na vorige uitdagings.