Liewe Dagboek: Dag 7 was vol haakplekke

‘n Week wat begin met ‘n Blou Maandag, verloop gewoonlik glad nie goed nie en vandag se haakplekke gaan die hele week voortduur. Wag maar en kyk. Dit het teen vieruur vanoggend begin reën. En ons het twee gate in die dak, een in elke slaapkamer op die boonste vloer. Enough said.

Oefenprogram: Ons het besluit om maar ‘n kans te vat met die reën en ‘n vinnige draai op die strand te loop. Net voordat ons die grootpad bereik het, het ons die dakwerkers teëgekom en besluit om liewer om te draai en te gaan hoor waarheen die meubels vandag geskuif moet word. Maar ons het met ‘n ompad teruggestap, oor ‘n duisend heuwels – wel, dit het so gevoel – net sodat ons darem ‘n bietjie sweet kan opwerk.

Haakplekke: Ek moes vandag my hele slaapkamer ontruim, wat beteken dat ek alweer in die kombuis sit en werk. Ek hou nie van die onderste vloer nie, want dis eintlik my man se domein en hy laat alle deure en vensters oophang. Dis koud, selfs in die middel van die somer. Dis ook nie goed vir my dieet om so langs die yskas en die vrieskas te werk nie.

Dit het die hele dag aan en af gereën. Die dakwerkers het aangehou met werk en die gemors rondom die huis hoop op. Niks word weggery nie en die man met die bakkie het ons verlede week laas gesien. Ons huur die huis en die reëlings vir die werk aan die dak word deur die huisbaas gemaak, so ek het ook nie regtig ‘n idee wat aangaan nie.

Die foto is geneem buite ons garagemuur aan die voorkant van die kompleks. Dis net die vrot gras en plastiekbedekkings plus bourommel wat verwyder is om die dak oor te dek. Let op dat alles opgestapel lê voor die brandkrane. Aan die anderkant van die huis lê die hout van die kaste wat uitgehaal is en die nuwe graspolle wat nog gelê moet word. Binne lyk dit nie veel beter nie. Stof in elke hoekie. Ek smaak hierdie leefstyl stukkend *druipende sarkasme*.

Plesier: (?!) Ons het hierdie week se episode van Game of Thrones gekyk. Sonder om snaaks te wees, dit was tydmors. Die draaiboeke was swak geskryf en die tonele het heeltemal afbreuk gedoen aan die boeke en die vorige episodes in die reeks. My bek is dik vir hierdie Blou Maandag en ek gaan vroeg slaap.

My “to do” lys

Stilte.

Beoordeling van hierdie dag

Een groot frustrasie.