Liewe Dagboek: Dag 5 het die senuwees geknaag

Liewe Dagboek, vandag was my senuwees goed op hol, sommer vroegoggend al, toe ek opgelet het hoe die lig deur my kamer se dak skyn. Dis reg, déúr my dak. Die dakwerkers het Vrydag net die laaste bondel gras mooi netjies in posisie gelê, en huis toe gegaan. Ek gee nie juis om vir vars lug nie. My vensters staan dag en nag oop. Wawyd. Maar lug en lig wat deur my dak ingevoer word, is ‘n graspol van ‘n ander kleur. Ek weet ook nie hoekom ek juis verbaas is nie, want dinge wérk maar so hier by die Suidkus – as die uitvalklok lui, trek jy jou baadjie aan en gaan huis toe.

Die probleem was egter dat Saterdagoggend aangebreek het met die reuk van reën in die lug en druppels teen die oop vensters. Die weervoorspelling vir die naweek het niks gedoen om my beter te laat voel nie. Hoekom het ek gelag toe Karen kom rapporteer het dat sy dieselfde probleem in haar kamer waargeneem het? Sy lê en slaap reg onder haar luggat – my bed is darem tenminste teen die ander muur.

Oefenprogram: Dit was koud en nat. Ek en Karen het nie kans gesien om te gaan loop nie, maar dit was toe nou ook nie ‘n groot probleem nie, te dankie aan die dakwerkers. Ons het vroegoggend begin om (weer) ons besittings rond te dra. Ek is keelvol daarvoor om lessenaars met al die rekenaarparafernalia rond te skuif. Hier wil die wifi nie opvang nie. Daar is die sig te swak en ‘n lig moet geskuif word. Daar anderkant is ‘n koue trek tussen my blaaie. Op die onderste vloer is dit te koud en beknop. Maar die toerusting moet beskerm word, dus word die twee gewillige osse maar oorlaai.

Ons het maar gemaak asof al die afbuk, optel en swaar dra goeie oefening is. Ek sien egter geen verskil aan die tjoepie rondom my maag nie. En Maandag gaan hulle begin werk aan die nok, wat beteken dat ons nog ‘n rondte musical furniture moet speel. Hou senuwees, hou!

Die beloofde reën het toe nie gedurende die dag opgedaag nie (viva la weerburo!), maar daar is nog altyd die donker nag wat voorlê. Die res van die naweek ook. Ons het oral handdoeke neergelê en nou moet ons maar naels byt.

As troos het Karen vir ons ‘n heerlike pot groentesop gekook. Geurig en warm. Pa het nog onderlangs gebrom oor die stukkies wortel wat hy bespeur het, maar twee giftige kyke het hom vinnig sy lip laat zip.

Sosiaal: Die res van die middag het ons maar agter die rekenaars deurgebring. Sosiale verkeer in die kuberruim. Ek het ‘n slag tyd gehad om ‘n paar blogs te skryf en deel te neem aan die Towerinne se nuwe uitdaging.

Ek het ook besluit om aan Wolfie (Wolfshadowwhispers) se nuwe uitdaging #LeesMetGees deel te neem. Wolfie lees op die oomblik Stephen King se Duma Key, wat ek reeds twee keer geluister het (audioboek). Ek wag in spanning om te hoor wat hy daarvan dink. Die baie rekenaarwerk is ‘n stremming op die oë en ek verkies om audioboeke aan te skaf sodat ek rustig kan luister. Andersins gebruik ek my kindle sodat ek die leesfont kan vergroot.

Ekself luister op die oomblik nog steeds na die Game of Thrones audioboeke elke keer as ek ‘n tydjie te spaar het om Candy Crush te speel (ja, ek hoor hoe rol die oë). Ek is nou op boek 5 en geniet dit vreeslik, ten spyte daarvan dat ek ook die reeks op TV volg. Die reeks wyk so hier en daar af van die boeke en laasgenoemde is heelwat meer eksplisiet wat geweld en seks betref. Maar ek dra big girl pênties, so no problem.

Ek lees natuurlik deesdae met groot genot die nuwe Vrye Weekblad (daardie oë wat so rol!) asook die artikels geplaas op Ground Up. En dan – ek lees woordeboeke soos wat ander mense resepte lees en geniet alle artikels wat geplaas word oor die Afrikaanse taal, bv. op Maroela Media. Blogs. O ja, ek lees ‘n wye verskeidenheid blogs. Vir die doel van die uitdaging kan ek saamgesels oor al hierdie goete.

Saans in die bed lees ek op die oomblik ‘n tweede boek uit die No. 1 Ladies’ Detective Agency reeks van Alexander McCall Smith. Dis lekker ligte vermaak – stories wat in Botswana afspeel.

My “to do” lys

Sug. Ons gesels volgende week verder hieroor.

Beoordeling van hierdie dag

Yarwellnofine. ‘n Pilletjie vir die senuwees sal goed afgaan.