Liewe Dagboek: Dag 4 was ‘n annerlike dag

Liewe Dagboek, vandag was, volgens alle standaarde en norme, ’n annerlike dag. Dis wat die Noord-Kaapse mense dit sou noem. Annerlik is nie noodwendig sleg of noodwendig goed nie, dis net andersoortig.

Oefenprogram: Vanoggend met die wakkerwordslag het ek aan my bas gevoel dis ’n winterse dag met ’n skraal windjie wat vroegoggend al woelig was. Ons het besluit om weg te bly van die strand af en het windjekkers gegryp met die uitgaanslag. Loop moes ons loop, want gister se oefening was maar so effentjies – vandag het ons ’n goeie kardio-aktiwiteit nodig gehad.

Gewoonlik draai ons links by die motorhek om tone te klap strand toe, of dalk winkel toe. Vandag het ons regs gedraai en teen die bult begin uitstap. Ons woonkompleks lê onder in ’n laagte by die rivier en die res van die mensdom bly daar bo teen, of op, die bult.

Die pad om die perimeter van die dorpie is gedeeltelik grondpad. Baie stil en rustig onder die bome deur. Die eerste kilometer of so het ons onsself verwonder aan die skade wat die vloedwaters aangerig het. Die teerpad aan die onderkant is letterlik opgefrommel deur die krag van die water, en hoër op is daar groot slote op die ryvlak. Die water syfer steeds uit die grond.

Halfpad teen die bult op, om ’n draai, het ons op ’n groot trop ape afgekom – daar het tenminste vyftig van hulle in die pad rondgesit. Toe ons nader beweeg het, het die brandwagte sulke kort blafgeluide begin maak en die hele trop het in die bos verdwyn. Ons is maar lugtig vir hulle as hulle in sulke groot getalle saamtrek.

Teen hierdie tyd het my tong al op die grond begin sleep en my kardiotoerusting het dringend teen my ribbebene begin skop. Opdraandes is nie my sterk punt nie. Teen die afdraandes af terug huis toe moes ons briek aandraai om nie teen die bult af te rol nie en my kuitspiere is ietwat geïrriteerd met my vanaand.

Werk / pligte: Ek het probeer en darem een webblad geproeflees voordat ek totaal my humeur verloor het. Chrome is soos ’n steeks donkie en Microsoft Office trek stadiger as ’n ossewa. Dis al lankal ’n probleem, maar vandag was die dag wat ek besluit het om te migreer na Firefox en Google Docs toe. So halfpad deur my migrasieproses het die internet gevrek. Ek het alles net gelos en die oorblyfsels van gister se kerrie uit die yskas gehaal om verder te werk aan my sooibrand.

Na ete was die internet weer terug en ek het net my sit gekry, toe hoor ek hamerslae bo my kop en stof begin neersif oor my lessenaar (wat nou in my slaapkamer staan). Die dakwerkers het besluit om oor te skuif na hierdie punt van die huis toe. Ek moes inderhaas kombuis toe trek en daar gaan sit en werk. Nog nie behoorlik gesit nie, toe roep my man dat die stof op die bure se wasgoed reën. Hulle slaap elke middag na ete vir ’n uurtjie of twee en ons wou hulle nie pla nie – het maar die wasgoed gaan afhaal en ingebring.

Teen drie-uur het die dakwerkers opgepak en ek kon weer by my lessenaar kom, maar alles, insluitende my bed en die los goed wat ons oorgebring het van Karen se kamer af toe hulle daar gewerk het, was toe onder stof. Ek moes my weg oop stofsuig. Hulle kom weer Maandag terug. Ek sal moet begin rondbel vir skoonmaakdienste.

In die nuus: ’n Vrou is helderoordag ontvoer hier in ons omgewing en is gelukkig ná 10 ure veilig teruggevind. Ons het heeldag die nuusgroepies dopgehou en is baie verlig oor die gunstige afloop. Ons is altyd op ons hoede wanneer ons gaan stap of selfs net winkel toe ry, maar sulke gebeure maak ons net weer bewus van die gevare wat oral lê en loer.

My “to do” lys

• Gee aandag aan skryfkursus (meer besonderhede later)
• Gee aandag aan Zulu-kursus (meer besonderhede later)
• Begin met daardie skryfprojek (meer besonderhede later)
• Skryf daardie storie oor die Platjan-kroeg klaar
• Ja. Sug.

Beoordeling van hierdie dag

’n Annerlike dag, ja. Dankie, tog dis naweek.