Eienskappe: Sy is oud maar haar bene is nog mooi

Hierdie Lê-Jou-Eier bloguitdagings maak my ook soms lam in die bene, maar siende dat ons nou hierdie week oor onsself en ons eienskappe mag praat, sal ek sommer bene eerste inspring met my bydrae. Ek is immers gebore onder die teken van die Leeu – ons hou van aandag en is glo baie arrogant. Is ons? 🤔

Een van my opmerklike eienskappe is dat ek baie vinnig boos word, en net so vinnig weer kan lag ook – vir die persoon wat my boos gemaak het en sommer vir myself ook. Maar soms bly daar tog so ‘n bietjie boosheid vassteek en ek broei daaroor. En wanneer ek loop en kekkel oor ‘n gewaande onreg, kan jy die bose heks binne my herken.

‘n Paar dae gelede loop ek en Karen straataf strand toe. Daardie tyd van die oggend kom ons heelwat mense teë wat op pad is werk toe, en ons stop soms vir ‘n geselsie. Op hierdie besondere oggend roep iemand van agter ons:
“Hello”. Ons kyk om. Sy is pragtig. Die glimlag breed en spierwit. “Is this your mama?” vra sy vir Karen.

Onmiddellik gaffel boosheid aan my psige. Wanneer ek in my dogter se geselskap is, ignoreer mense my gewoonlik. Oumense, ouer mense, mense van my ouderdom, word mos onsigbaar – ons is nie all there nie. Diegene wat so dink, ignoreer ek sommer ook, want ek kan my nie bemoei met ander se onnosele aannames nie.

Maar die gesprek op die strandpad gaan voort ten spyte van my geestelike afwesigheid. “I can see your mama is old, but she still has beautiful legs.”

En mama se boosheid verdwyn soos mis voor die son. Mama loop op die strand en maak verspotte liedjies op oor haar beautiful legs. En sy lag.

Maar daardie stukkie boosheid wat vasklou … Ek dink dat mense te geneig is om ander in boksies te plaas en dit grief my geweldig. Ek het ‘n “ding” omtrent diskriminasie op grond van ouderdom, geslag, seksuele voorkeure, godsdienstige oortuigings, noem dit maar op. Daar is altyd die verwagting dat mense op ‘n sekere manier moet optree om te pas by die boksie waarin hulle geplaas is.

Kyk! ek loer oor my boksie se rand en lig my vloekvinger op.

Aan die ander kant, as jy lus het om die hele dag lank te teem oor jou boksie, met die bedoeling om my te oortuig om by jou in te klim, gaan doen dit in iemand anders se ore asseblief. Het ek genoem dat ek baie vinnig verveeld raak? Moenie jou oortuigings in my keel afdruk nie. Ek kam my hare soos ék wil en niks wat jy daaromtrent te sê het, maak enige indruk op my nie.

Ek is darem nie heeltemal “af” nie. Ek slaan nie my man nie. Ek vloek nie. Nie te erg nie. Ek is redelik verdraagsaam, maar ek vat nie k@k van kabouters nie: moenie probeer om my te misbruik nie; moenie my privaatheid te diep probeer binnedring nie; moenie enigiets doen wat my verhouding met my gesin kan benadeel nie en moenie my in die rede val wanneer ek iets probeer sê nie. Sien? Kom net my reëls na, dan sal ons goed klaarkom.

En gaan herdink tog asseblief jou opvattings oor oumense.

Hier is die Inlinkz-skakel vir die uitdaging wat vandag om 12:00 pm open:https://fresh.inlinkz.com/p/6061e1ded6fa403bb328f7fe5decfe6d

Bloggers wat nog nie voorheen deelgeneem het aan ons Lê-Jou-Eier bloguitdagings nie: Om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakels Lê-Jou-Eier: Reëls en Lê-Jou-Eier: Hoe neem ek deel? Laasgenoemde blogpos bevat ook al die onderwerpe en skakels na vorige uitdagings.