ESKOM is regtig besig om my stout te maak

Stout, ja. Dis wat ek gesê het. Maar nie die soort stout wat jy nou in gedagte het nie. My ma het my beter geleer: “Donkerwerk is konkelwerk”. Maar ek raak by die dag meer beïndruk met die feit dat ESKOM my hardhandig dwing om op te hou met werk en liewer my tyd op die strand te gaan deurbring. Ek gaan gewoond raak aan hierdie niksdoen-effek en dan? Dan gaan ek heeldag vakansie by die see hê.

Gelukkig speel ons weer saam en ons het lieflike dae hier. Natuurlik is daar die winderige dae – soos vandag – maar dan gebruik ek die wind om gou-gou my wasgoed (en swemklere!) droog te maak. Ander dae is dit bewolk en reënerig, maar glo my, dis dalk beter. Dit raak geweldig warm hier op die oomblik en die son het net een doel voor oë – hy wil alles tot as verbrand.

Ek en Karen gaan swem graag by Twenistrand tydens hoogwater. Daar is ‘n sandbank waar die branders rustige hobbels maak waarop jy kan lê en dryf. Tydens laagwater moet jy heelwat dieper in die see ingaan om behoorlik nat te word. Ons was eergister weer daar, maar die rivier het deurgespoel en die seewater was ‘n vaal sanderige kleur. Karen swem nie in sulke water – haaie hou blykbaar van vuil water. Ons het dus strandlangs geloop om te gaan kyk hoe lyk dit daar by die riviermond. Kyk net na die grafitti wat ons van naderby kon beskou. Gewoonlik is die rivier te diep om dit regtig te waadeer.

Ons hou daarvan om in die river te swem, maar die water was regtig modderig en ons het besluit om uit te wyk na Southport toe. Die foto hieronder is geneem in Januarie – ek en Oudste wat swem in die rivier.

Southport (loopafstand van ons huis af) het natuurlik die beste getypoel hier in ons onmiddellike omgewing en ek het al fotos daarvan geplaas, maar newwermaaind, hier is nog een. Ek het die hele swembad vir myself gehad (kan jy my kop sien uitsteek daar agter teen die muur?) en selfs die reënbuitjie wat uitgesak het, kon my nie uit die water dryf nie. Ek het hier rondgedryf vir ‘n lang tyd terwyl Karen op ‘n rots gesit en die see aan die anderkant van die muur dopgehou het vir … ahem … haaie en so aan. So dankie ESKOM.

Op ‘n ander trant: ons is genoodsaak om werk te staak as die krag afgaan, want die selfoon-netwerk word ook geaffekteer. Blykbaar is daar nie batterykrag of enige ander soort krag beskikbaar om ons selfoontorings aan die gang te hou as ESKOM ons krag afsit nie. Die gevolg is dat ons selfone se stemmetjies ook stil is en selfoondata is vir my dan niks werd nie. Dis hoekom ons Telkom se ADSL moet gebruik. Ons is sekerlik nie die enigste mense in hierdie posisie nie en waar gaan ons land se produktiwiteit heen?