Kaleidoskoop Hoofstuk 13: Nellie is in die moeilikheid

Hierdie is ‘n vervolgverhaal deur verskillende bloggers. Om die eerste 12 hoofstukke te lees, klik op hierdie InLinkz skakel:

  http://www.inlinkz.com/new/view.php?id=789999

Bloggers wat deelneem aan die skryf van hierdie vervolgverhaal moet asseblief die boodskap onderaan hierdie hoofstuk lees.

Nellie vou soos ‘n knipmes toe onder die aanslag van die botsing met Renier en snak na haar asem.  Elke gekneuste ribbebeen gil die plesier van sy eie pyn uit en sy voel hoe drup die bloed weer van haar kopwond af.

“Waddehel???” Renier skuur tot stilstand op die tuinpaadjie en vergaap hom aan die spektakel voor hom: die deurmekaar blonde hare waaruit ‘n strepie bloed syfer, die rooi mond wat grotesk oop en toe gaan soos ‘n nat vis wat probeer asem haal op droë grond en trane wat uit die blou oë stroom.

“N..Nellie?” stotter Renier onseker.

“Nellie?” sê-vra die Aphrodite wat op een stiletto aangehobbel kom. Sy bly wankelend staan, verloor dan haar ewewig en val in Renier se rigting. Renier verloor ook sy balans en tuimel grond toe met Aphrodite wat soos ‘n neet om sy nek klou. Nellie steek instintief ‘n hand uit om te help en die armspalk tref Aphrodite vierkantig in die gesig. “Argh!” gil Aphrodite toe haar neusbrug met ‘n hoorbare kraakgeluid breek.

Verslae en wasbleek geskik staar Nellie na die Double D’s daar voor haar voete. “Klara? Klara!” hyg sy met hortende asemstote.

Klara antwoord nie, gluur net na Nellie met onverbloemde wrokkigheid. “Jy’t aspris my neus gebreek, jou blêrrie teef!”

. . . . . . .

“CUT!” skree Atholl.

“Fanfokkentasties!” gil die fotograaf. “Dis die beste scene wat ons nòg geskiet het. Hoekom stop jy dit?”

“Sjarrap, jou swaap!”, gil die regisseur op hom. “Kan jy nie sien die spul het regtig seergekry nie? Kyk al die bloed en daai een is lights out”, beduie hy na die akteur wat nog steeds vasgedruk lê onder die Double D’s.

“Wel”, lag Melinda, “ek moet sê, ek kon die toneel nie beter geskryf het nie.”

. . . . . . .

Die volgende dag

Renier wurm hom self onder die Double D’s uit, staan op en loop so waardig as moontlik na Nellie toe. Sy gesig is strak en hy kyk haar nie in die oë nie. Hy knaag aan sy onderlip.

“Sunè … nee, Daniella … ag ek bedoel Nellie … ag shit”, en hy kyk verskonend na die regisseur.

Atholl sug. “Cut.”

Take five. Renier wurm hom self onder die Double D’s uit, staan op en loop so waardig as moontlik na Nellie toe. Sy gesig is strak en hy kyk haar nie in die oë nie. Hy knaag aan sy onderlip.

“Nellie Visagie, ek neem jou in hegtenis op aanklag van bedrog en geldvervalsing.” Die boeie klik om Nellie se polse vas. “Ek neem jou nou na die polisiekantoor toe waar die amptelike klagtes gelê sal word en ondervraging sal plaasvind.”

Nellie staar hom net verwese aan. Hy het haar nie eens ‘n kans gegun om enigiets te sê nie. Hoe kan hy sy hart so verhard teenoor haar? Is dit Klara … ?

Renier lei haar na sy motor toe, help haar om by die agterdeur in te klim en maak seker dat sy nie haar kop stamp nie. Sy kan nie glo dat sy binnekort in ‘n polisiesel gaan sit nie.

Wanneer Renier agter die stuurwiel inskuif en sy sitplekgordel vasmaak, leun sy vorentoe:  “Waar kom Klara aan daai paar, um, lugbalonne?” fluistervra sy.

Renier kyk verbaas na haar. Dan proes hy van die lag.

“CUT!” gil Atholl. “Cut, cut, cut! Ag jimmel tog.”

. . . . . . .

Nou is Nellie op pad polisiekantoor toe. Of is sy? Gaan Renier haar opsluit of wat voer hy in die mou? Julle sal maar moet wag vir die volgende episode van hierdie sepie.

BELANGRIKE BOODSKAP AAN ALLE DEELNEMENDE BLOGGERS

Nellie is aan die brand, op galop soos ‘n weghol-perd, en ek kan sien hoe al die bloggers haar geniet. Sommige van ons skrywers het nou vir ‘n tweede rondte ingeskryf! Hierdie is ‘n uitnodiging aan die oorblywende bloggers wat nog nie ‘n tweede kans gehad het nie, om in te skryf voor Donderdag 23 Augustus om 19:00.

Ek het die afsluitdatum vir die vervolgverhaal aangeskuif na einde September toe en InLinkz is opdateer, om seker te maak dat ons genoeg tyd het om klaar te maak. Nog ‘n maand behoort genoeg te wees om die verhaal af te rond mits ons die momentum behou. Indien ons vroeër klaarmaak, is dit ook goed.

En wat gebeur hierna? Van die bloggers het gevra vir nog ‘n skryfsafari en hierdie keer gaan daar ‘n tema aan gekoppel wees. Dit gaan pret wees, dis AL wat ek op hierdie stadium gaan verklap 🤐 my lip is gezip!