Vrydag – die klein klippies in my skoen maak seer

Vrydag breek aan met ‘n flouerige sonnetjie nadat dit die hele nag deur gereën het. Die reën is welkom, want ons het Februarie laas ‘n druppel van bo gesien en dis droog, baie droog. Selfs die aalwyne het hierdie jaar verskrompel van die droogte, die snerpende wind en die son.

Maar (daar is mos altyd ‘n maar), my dogter het my wakkergemaak met die nuus dat die dak gelek het – water in ‘n haar slaapkamer se hangkas. Daar is aan die dak gewerk voordat ons ingetrek het en die kas se rakke in die hoek is uitgehaal – moet nog vervang word, maar ons het met opset gewag vir die reën, want waar ‘n grasdak eers gelek het, is daar altyd probleme. Nou weet ons darem waar die water inkom en die kas gaan moet verhuis. Natuurlik sal die grasdekkers ook weer moet kom. Nat handdoeke die hele wasgoeddraad vol 😒 en hier is nie juis baie pakplek nie.

Telkom het nog steeds nie opgedaag nie en Karen se slaapkamer is ‘n tydelike kantoor (“tydelik” vir die afgelope ses weke reeds, want dis die enigste plek waar ons die bure se wifi-seine kan optel). Ek het ‘n klagte gelê by ICASA (Independent Communications Authority of South Africa) twee weke gelede en het onmiddellik ‘n epos met ‘n verskoning van Telkom af gekry. Verlede Maandag het ‘n vriendelike tegnikus opgedaag wat die kabel gelê het van die straataansluiting af tot in die kompleks – vyftien minute se werk. Ons het bygestaan toe sy die tegnikus gebel het wat verantwoordelik is daarvoor om die kabel van die kompleks se aansluitingspunt tot in die huis te lê, om hom in te lig dat die kabel in plek is.

Ons het twee dae gewag en toe weer die Call Centre gekontak, net om te hoor dat die tegnikus sewe werksdae tyd het nadat die kabel geïnstalleer is om die lyn na die huis toe aan te lê; hy sal ons bel en ‘n afspraak maak wanneer sy werkslading dit toelaat; dis hulle “proses”. Blykbaar is sy werkslading gròòt.

Intussen stuur Telkom vir my rekenings vir die maande van Junie, Julie en Augustus. Die lyn is gesny deur Telkom aan die begin van Junie (ek het hulle 30 dae kennis gegee van verhuising en dat my lyne oorgeplaas moet word op 29 Junie). Toe sny hulle sommer onmiddellik die lyn, enkele minute na die telefoongesprek. Nou moet ek betaal vir dienste wat ek nie gehad het nie? Ek dink nie so nie. Ek het hulle vanoggend laat weet dat ek Maandag weer met ICASA in verbinding gaan tree. Hopelik sal hulle na beide klagtes omsien.

Intussen het ek ook ‘n probleem gehad met my korttermynversekering. Ek het met hulle in aanraking gekom voordat ons getrek het en ‘n kwotasie gekry omdat ek bewus is daarvan dat premies hoër is vir grasdakhuise, maar ek was tevrede met die bedrae wat genoem is. Teen betalingstyd het ek agtergekom dat die premie gestyg het met ‘n whopping 250% en boonop het die maatskappy ‘n eenmalige fooi van R1700 bygevoeg vir Julie. Net omdat ek van adres verander het? Ek het die betaling deur die bank laat terugstuur (en R140 betaal vir die plesiertjie). Daar is ‘n nuwe premie beding en gevorder en hopelik is hierdie probleem nou iets van die verlede.

Die grootste irritasie bly nog steeds die feit dat ek nie ‘n huistelefoon het nie. Telkom kan slegs van ‘n landlyn af gebel word. Die meeste besighede het tolvrye nommers, maar hulle is ook net tolvry mits hulle van ‘n landlyn af gebel word. Ons selfoonsein is swak en dit werk bitter duur uit om aanhoudend te bel na ‘n landlyn toe (Call Centres!) waar jy lank moet wag voordat jy iemand in die hande kry om mee te praat. Ons “Deelnet” is stadig, met die gevolg dat epos laat ontvang word of dat die dokumente doodeenvoudig nie wil oopmaak nie. Ons sukkel om aanlynbankdienste te gebruik, om ons cloud server se adminfunksies te gebruik, om webtuistes in stand te hou. En wie moet ons bedank? Definitief nie Boland Bank nie.

Dis dan hoe ek my Vrydag deurgebring het – deur koud te kry, met ‘n lekkende dak te sukkel, besighede te probeer oorreed om dienste te lewer, my rekenaar luidkeels aan te moedig om ASSEBLIEF tog wakker te word …

Dankie dat jy bereid was om na my kak-en-kerm-sessie te luister. Om dit te lees, bedoel ek. Alles wat lekker is vir die naweek.