Dis Ekke

My vreugdes en frustrasies

BookTalk

Old books

Die BookTalk verhale vorm deel van die Lê-Jou-Eier bloguitdagings waaraan ‘n klompie Afrikaanse bloggers deelneem. Boeke kan gratis afgelaai word in PDF, MOBI en EPUB formaat. Gebruik die DOWNLOAD COVER funksie om die boek se voorblad af te laai. Ander bloggers word uitgenooi om deel te neem of net saam te lees en te skaterlag vir die manewales van die deelnemers.


DIE VOORTVLUGTIGES (APR 2018)

Hierdie is die opvolg van die fiksie-verhaal Die Perfekte Misdaad, geskryf deur die Afrikaanse skrywers van Blogland.

Die misdadigers van Toweropstal beroof hierdie keer ‘n bank met behulp van drie spoke en die plaaslike polisiemag. Lees hoe die avontuur verloop soos beskryf deur die misdadigers self.

TAGGED: Misdaad, Crime, Fiksie, Fiction


DIE PERFEKTE MISDAAD (FEB 2018)

Die boeiende verhaal van ‘n misdaad beplan en uitgevoer deur Afrikaanse bloggers. Volg die loop van die verhaal soos beskryf deur die misdadigers self.

Die verhaal speel af op die plaas Toweropstal in die Oos-Kaap. Die misdadigers was amateurs wat toevallig verneem het van ‘n geleentheid om vinnig ryk te word.

TAGGED: Misdaad, Crime, Fiksie, Fiction


KALEIDOSKOOP

(Bloguitdaging – die vervolgverhaal in wording)

Inskryfvorm

Lys van deelnemers

InLinkz skakel: http://www.inlinkz.com/new/view.php?id=789999

Blogger 1 (Hester):

Nellie Visagie is reeds op negejarige ouderdom deur haar armlastige ouers uitgeplaas om by haar pa se ryk broer en sy gesin op hulle plaas te werk as diensmeisie en kinderoppasser, in ruil vir gratis skoolopvoeding. Sy is baie ongelukkig by die gesin, maar bly tog nog twee jaar aan nadat sy haar skoolloopbaan voltooi het, uit skuldgevoel teenoor die familie. Dan, wanneer die las te veel word, besluit sy om weg te loop. Sy “leen” haar oom se bakkie om tot op die dorp te ry, asook haar tante se duur leertas waarin sy onder meer van haar tante se Franse papier en fyn kleertjies ingepak het om saam te vat. Dan gaan staan sy langs die pad met ‘n pap wiel en kan nie besluit hoe sy haarself uit die penarie kan red nie.

Blogger 2 (Lekkervurig):

Nellie besluit om voort te gaan met haar wegloopplanne, maar sy wil die gesteelde goedere agterlaat op die bakkie. Sy krap rond en vind ‘n toksak in die bakkie se kajuit waarin sy haar klere kan pak, maar toe sy die sak oopmaak, vind sy drie bondels R200-note in die tas. Met die geld en haar klere in die tas loop sy tot by die busterminus in die dorp en koop ‘n eenrigtingkaartjie na Bloemfontein waar sy oornag. Die volgende dag by die lughawe besluit sy om ‘n vliegtuig te haal Johannesburg toe, maar sien toevallig vir Chris Viljee (lid van die ryk familie op die plaas waarvandaan sy weggeloop het) op die lughawe. Sy lei van sy selfoongesprek af dat hy ook dieselfde vlug na Johannesburg toe wil haal as sy en besluit om liewer die vliegtuig na Kimberley te haal. Op pad na die vliegtuig oor die landingstrook verbeel sy haar dat sy iemand na haar hoor roep. Sal sy omkyk of die persoon ignoreer?

Blogger 3 (Travel460):

Nellie kyk nie om om vas te stel of iemand wel na haar geroep het nie, maar haas haar na die vliegtuig waar sy haar sitplek langs ‘n ouerige dame met ‘n klein seuntjie vind.

Sy bekommer haar oor die feit dat Chris haar dalk herken het en dat iemand sal probeer om die geld terug te kry. Wanneer sy saggies begin huil, bied die klein seuntjie haar ‘n suiglekker aan. Hy herinner haar aan haar eie boetie, Monty, wanneer sy oplet dat die vrou gebaretaal met hom praat – hy is stom. Sy vind troos in sy aanraking en verneem dat sy naam Jakkie is. Sy noem nie haar eie naam vir hulle nie.

By hulle aankoms wag Jakkie se oom vir Jakkie en sy mamma in. Net vir ‘n oomblik skrik Nellie wanneer sy die oom se polisie-uniform sien. Op aandrang van Jakkie vra sy oom, Renier, baie vriendelik of hulle vir Nellie iewers kan aflaai.

Nellie besef dat sy op hierdie punt ‘n besluit moet neem wat haar toekoms gaan bepaal: gaan sy bly of voortgaan met haar reis?

Blogger 4 (Seegogga):

Op die plaas van die Viljees het Oom Esra pas agtergekom dat sy bakkie weg is. Dit wil sê die geld is ook weg. Hy verneem by tannie Krissie of sy die bakkie uitgeleen het, maar sy ontken dit. Nellie is ook nêrens te vinde nie. Dan bel Chris met die nuus dat hy vir Nellie op die lughawe gesien het en sy pa gee hom opdrag om uit te vind waarheen Nellie op pad is. Intussen ondervind Oom Esra ‘n pyn in sy bors – dis verby, weet hy en hy het nie nog geld nie; sal hy bieg en sy testament verander of die hospitaal bel.

Ns. Dit blyk uit hierdie aflewering dat die twee Viljee-kinders aangeneem is, dus nie Nellie se bloedfamilie nie.

Blogger 5 (Tannie Frannie):

DEEL 1

Oom Esra besluit daarteen om miskien hospitaal toe te gaan en besluit om liewer sy laaste tydjie te gebruik om ‘n brief aan Nellie te skryf waarin hy haar vertel dat hy haar eie pa is. Hy noem ook dat Nellie se oudste broer bewus was van hierdie toedrag van sake en Oom Esra afgepers het tot op die punt waar hy geen geld meer het nie. Dis nog net die plaas wat oor is en hy wil hê dat Nellie ‘n derde van die plaas erf – sy moet sy laaste boodskap oordra aan Chris en Klara sodat hulle die prokureur in kennis kan stel. Dan syg hy inmekaar.

Klara sien wat gebeur en stel vas dat haar pa nog asemhaal en ‘n ambulans word ontbied. Wanneer die ambulans en ook Tannie Krissie en Klara vertrek na die hospitaal toe, vind Lettie, die huishulp, Oom Esra se se nota op sy lessenaar en lees dit. Sy kan nie besluit of sy die nota net op die lessenaar moet laat of dit net eenvoudig opskeur / weggooi nie; sy weet dat die inligting die familie uitmekaar kan skeur.

Deel 2

Jakkie se mamma, Marli, nooi Nellie uit om by hulle oor te bly en Nellie aanvaar die aanbod. Sy stel haarself voor onder die vals naam, Sunè Davel. Jakkie se oom, Renier, neem hulle na die huis toe waar hy, Marli en Jakkie saamwoon sedert Jakkie se pappa se dood. Renier let op dat Nellie senuweeagtig is toe hy probeer om die toksak met geld by haar te neem om dit in die kattebak te plaas. Sy hou die sak by haar en steek dit later diep in haar kas weg.

Jakkie beduie vir Nellie dat Marli graag weer wil gaan werk, maar sy moet iemand kry om hom (Jakkie) op te pas. Hy dink die oplossing is dat Nellie na hom moet omsien wanneer sy mamma gaan werk.

Nellie lees die volgende oggend in die Volksblad-koerant van vervalste R200 note wat in omloop is en wat die vorige dag gebruik is om verblyf by die Road Lodge in Bloemfontein te betaal. Dit is die gastehuis waar Nellie ingeboek het onder die naam Sunè Davel en haar verblyf met Oom Esra se geld betaal het. Sy besef dat haar geld eintlik niks werd is nie en dat die polisie boonop op haar spoor is.

Renier kom op haar af waar sy die koerantberig lees en merk op dat daar iets is wat haar hinder. Nellie besef dat dit ‘n verligting sal wees om haar hele verhaal vir iemand te vertel wat sy kan vertrou. Is Renier hierdie persoon en sal sy teenoor hom bieg of liewer vlug?

Blogger 6 (Iscrap2):

Nellie is steeds in vertwyfeling oor wat haar volgende stap moet wees. Marli oorweeg dit om haar te vra om Jakkie op te pas terwyl sy, Marli, haar loopbaan voortsit. Jakkie is duidelik reeds baie lief vir Nellie en sy vir hom. Daar is egter die probleem met die poliesie wat op haar spoor is (en Renier, Jakkie se oom met die sielvolle blou oë, is ook deel van die polisiediens!). Boonop ken hulle nou vir Nellie op haar skuilnaam, Sunè Davel, dieselfde naam wat sy gebruik het in Bloemfontein toe sy by ‘n gastehuis ingeboek en haar verblyf met die vervalste R200-note betaal het. Dit lyk asof die net stywer span en Nellie sal binnekort moet besluit wat sy gaan doen.

Blogger 7 (Positief):

Nellie wil baie graag in Kimberley bly, maar toe daag Chris op by Marli se huis en vertel vir Renier dat Nellie sy niggie is en dat sy by hulle bly onder ‘n vals naam. Nellie pak inderhaas haar goedjies in haar toksak en vlug by die agterdeur uit. ‘n Vriendelike omie wat homself voorstel as oom Danie, laai haar op en neem haar saam na die lughawe toe. Nellie wil nie van ‘n kommersiële vlug gebruik maak nie en betaal R20,000 om aan boord van ‘n privaatvlug na Lanseria te vlieg. Halfpad op pad daarheen ontwikkel die vliegtuig skynbaar meganiese probleme … of is dit net turbulensie?

Blogger 8 (Bondelsgedagtes):

Renier is baie omgekrap oor Chris se aantygings, maar dan kom Marli agter dat Nellie weg is. Jakkie vertel vir hulle dat Nellie saam met oom Danie weggery het. Hy gaan na haar soek, maar haar spoor loop dood by die lughawe; sekuriteitskameras wys waar sy met die sekriteitsbeampte gepraat en navraag gedoen het oor privaatvlugte, maar haar naam is nie in die registers van een van die drie privaatvlugte wat op dieselfde tyd vertrek het nie.

Nellie word wakker in groot pyn. Haar arm is gespalk en daar is ‘n brandpyn oor haar ribbes. Sy probeer sien waar sy is – dit lyk soos ‘n houthut in ‘n woud. Dan maan ‘n kwaai mansstem haar om nie te probeer opstaan nie. Die man vra haar uit, wil weet wat met haar gebeur het en hoekom sy bebloed voor sy bakkie ingeloop het. Nellie kan niks onthou nie.

Kliek op die volgende skakel om te sien hoe die karakters reeds ontwikkel het:
Kaleidoskoop karakterkaart

Follow Dis Ekke

12 Comments

  1. Fantastiese avontuur met mede- towerinne en ‘n trio karnallies. ‘n Eerste van vele hoop ek.

  2. UItstekend, Baie dankie vir die uitdaging en ook die inmekaar sit van die boek. Dis heerlik gewees om alles te lees.

    • HesterLeyNel

      Dankie dat jy deelgeneem het. Ons maak weer so.

  3. Ons het elke oomblik by Toweropstal geniet.

    • HesterLeyNel

      Ja, die spinasietert het seker ‘n groot aandeel gehad in die genot 😜

      • Wat ek wel nou, na baie analise, met vertroue kan sê: Die bloggers is nie misdadigers nie, partytjiemakers is hul wel. 😁

        • HesterLeyNel

          Dis waar 😄

  4. Dit was ‘n heerlike uitdaging wat my met tye laat skaterlag het. Ek het die storielyn so geniet, en ons as bloggers glo ek het mekaar beter leer ken. Lank lewe Toweropstal!!!

    • HesterLeyNel

      Dis groot sports om dit so alles in een slag te lees, want dan volg jy die draad van die storie baie maklik.

  5. Ag ek kan my nie indink aan ‘n dag sonder die Towerinne en Hester en Abrie se kaperjolle nie. Dis onlekker. Daar is soveel storielyne, on kan ons eie lewenslange sepie skryf. Dit was ‘n fees en groot voorreg om saam met julle oulike en ondeunde bloggers op ons voortvlugtige verbeeldingryke avontuur te gaan….Hester ons wag.

Leave a Reply

This site uses Akismet to reduce spam. Learn how your comment data is processed.

Theme by Anders Norén

Back to Top
%d bloggers like this: