Wanneer dit reën en die riviere loop in KwaZulu-Natal

Ná gister se dringende waarskuwing van dreigende swaar reën deur die nag, het ons gewonder of die Mhlangamkulurivier wat langs ons kompleks verbystroom, dalk sal oorspoel na die see se kant toe. Ek sien in ‘n vorige blog Die geheim van die rivier het ek aangeteken dat die riviermonding laas in Augustus 2017 oopgemaak het. Hierdie afgelope reënseisoen het die water net telkens hoër opgestoot terwyl die sandbank by die monding ook al hoe hoër gegroei het. Die afgelope twee weke het ons egter opgelet dat die seewater met hooggety oor die duin gespoel het tot in die rivier en die sandbank het platter geword.

Die waarskuwing is ook net betyds uitgereik, want die verwagte reën het gistermiddag begin val en was hoorbaar dwarsdeur die nag. Vanoggend douvoordag het Karen afgeloop na die rivier toe om te gaan kyk en het teruggekom met die nuus dat die watervlak in die rivier gedaal het. Sien op die laaste foto hier onder wat vanaf die kompleks se wal geneem is – die water het gisteraand nog breed gestrek tot by die bootjies links in die foto.

Dit kon natuurlik nie hoër of later nie, ons moes in die reën afgaan strand toe om te gaan kyk wat aangaan by die monding. Dit het nog steeds ligweg gereën; vandaar die sambreel waarmee ek dit uitkap al langs die treinspoor af. In die fotos kan julle sien hoe vloei die water in die see in. Ons was aan die Sea Parkstrand se kant – die fotos is geneem in die rigting van Southport se hoofstrand.

Kliek op ‘n foto om ‘n groter weergawe in ‘n carousel te sien.

Ek het in my vorige blog, waarna ek hierbo verwys, vertel van die vis- en voëllewe in die rivier, maar nie genoem dat daar ook likkewane hou nie. Die video hier onder het ek gedeel vanaf die Facebookbladsy van ‘n die pragtige Dieu Donnee River Lodge, ‘n vakansie-akkomodasie skuins oorkant ons kompleks op die rivierwal aan Southport se kant.