Dis Ekke

My vreugdes en frustrasies

Wat lees ek?

Soen. ‘n Boek deur Jan Vermeulen (2017)

Ek het so pas Jan Vermeulen se boek “Soen” in een sitting gelees. Ek is op ‘n missie om oor die volgende paar maande soveel Afrikaanse boeke te lees as wat ek moontlik in my skedule kan inpas. Ter wille daarvan om my taalgebruik te verbeter.

Tot my vreugde is Afrikaanse boeke deesdae ook elektronies beskikbaar by die biblioteek. Ek het gister die grootste deel van die dag daaraan spandeer om die Nasionale Biblioteek se Libby-stelsel te leer ken. My selfhelplesse het daaruit bestaan om op lukrake wyse ‘n boek uit te kies en die borrow / place hold / read sample / tag knoppies te druk, net om te sien wat gaan gebeur. Toe ek weer sien, was Soen in my persoonlike leesrak. En ek kon nie ‘n beter keuse gedoen het as hierdie boek wat ek “per ongeluk” geleen het nie.

Ek het eers uitgevind dat ek besig was om jeuglektuur te lees toe ek reeds ‘n paar bladsye ingeasem het, maar op daardie stadium was ek nie van plan om op te hou met die lees nie. Die rede? Die vaardige en vars taalgebruik, die keuse van woorde en sinsnedes wat ‘n storie kort en bondig in die lewe roep – Afrikaans wat lekker loslit vloei.

SPOILER ALERT. My opmerkings mag dalk feite laat glip wat lesers nie noual wou hoor nie.

VRYWARING. Hierdie is nie ‘n resensie nie. Dis my persoonlike indrukke van ‘n boek wat ek gelees het.

Peet, die hoofseun van ‘n gesiene skool en aangenome seun van pastoor-ouers, is dolverlief op ‘n proefonnie. Hy raak verwikkeld in gebeure wat hom sy lewe kan kos, maar hy doen steeds alles in sy vermoë om sy nuwe groot liefde te beskerm.

In my ervaring is dit tipies tienderjariges, nie waar nie? Hulle kan tog so vóél op daardie ouderdom.

Die soen? Dis iets waaroor Peet droom. Totdat hy nie meer hoef te droom nie.

Wat my onmiddellik getref het, is dat hierdie jeugverhaal ver verwyderd is van die lyflike en emosionele onskuld van Saartjie en Galpil. Neem asseblief in ag dat my jeug reeds ver agter my lê – van hier af lyk my grootwordjare soos die beeldjie wat gesien word van die verkeerde kant van ‘n teleskoop af. Vandaar my verbasing oor taalgebruik en die geselstaal van die tieners. Laat ek my haas om by te voeg: dit word nooit onsmaaklik nie en klink geloofwaardig.

Die karakters is ‘n (baie polities korrekte) vermenging van ras, gender, godsdienstige oortuigings en vername persone met geraamtes in die kas – ‘n kleurvolle kombinasie. Geen heilige koeie nie. Geen doekies omgedraai nie. Ek wens daar was sulke jeugboeke beskikbaar in my jeug.

Die enigste klagte is dat dit vir my gevoel het asof ek die karakters nooit werklik in diepte leer ken het nie. Ek neem aan dis ‘n kenmerk van alle tienderjariges – my kinders was so – hulle gaan so vlugvoetig deur die lewe en is so egosentries dat hulle nie stilstaan en wonder oor wat ander mense laat tiek nie. Ja, dis ‘n veralgemening.

Sal ek hierdie boek aanbeveel vir tieners? Ek is effe uit voeling met hierdie deel van die bevolking, maar sou dit beslis aangeskaf het vir my eie kinders as hulle nie alreeds aan die veertigerjare gehap het nie. Hierdie 68-jarige tiener het dit baie geniet. Een ding is seker – tieners kan dalk ‘n paar goeie taallesse leer uit hierdie boek.

Ek sal dit beslis aanbeveel vir tienderjariges tussen die ouderdom van sestig en tagtig – dit mag dalk net ‘n eye-opener wees 😛

Follow Dis Ekke

14 Comments

  1. Ek moet erken, alhoewel ek ‘n hele paar engelse boeke op my rak het, lees ek NET afrikaans. Ek sal eerder geld op afrikaanse boeke spandeer as op engels. Geen idee hoekom nie.

    Wat my opval is dat daar BAIE mense is (op die groepe waaraan ek behoort) wat vreeslik baie jeuglit lees. Ek self kan net nie my tande in dit ingeslaan kry nie. Wens egter my kinders het meer gelees. Snaaks dat hulle in my huis grootgeword het en nie eintlik lees nie. #plaasoogrolhier#

    • HesterLeyNel

      Hulle het met veel meer keuses grootgeword as ons – tv, flieks wat elektronies afgelaai kan word, internettoegang, ens. Myne lees ook nie so baie soos ek nie. Ek maak ook gebruik van alles wat die nuwe tegnologie my bied, maar ek verkies nog steeds die geskrewe woord. Ek het vir baie jare, dekades eintlik, net Engels gelees, en het ‘n uitgebreide elektroniese biblioteek, maar nou wil ek my toespits op Afrikaans. Geld is nie meer so vrylik beskikbaar nie (ek mis my salaris – sug), dus maak ek vrylik gebruik van wat die biblioteek bied.

      • Ag ons biblioteek is SO pateties, ek wonder of daar nog ooit boeke is? En dis net te gevaarlik om soontoe te gaan in elk geval.

        Ek het ‘n Kindle as geskenk by my swaer gekry, maar hy lê seker al 4 jaar in my lessenaar. Splinternuut. Ek kom net nie reg met hom nie.

        • HesterLeyNel

          Ek het my kindle in 2011 gekry. Hy’s deurgeslyt van al die gebruik en outdated. Ek wens ek kon ‘n nuwe een bekostig. Ons ou dorpsbibliotekie is ook maar klein en die keuses beperk, dis hoekom ek so opgewonde is oor die nuwe aanlyndienste. Ons het darem nou ‘n nuwe, groot en moderne biblioteek gekry in Port Shepstone en ek gaan daar ook aansluit.

        • Julle is gelukkig!

          Ons biblioteek het vetkolle en goed op die tafels soos almal KFC sit en verorber IN die biblioteek.

        • HesterLeyNel

          Eeeeuw!

        • Om die minste te sê ja.

  2. Hoe/waar kry ons toegang tot libby?

    • HesterLeyNel

      Jy moet ‘n bestaande, geldige biblioteekkaartjie hê en dan moet jy jou biblioteek vra om jou te registreer vir Libby. Dit neem so ‘n dag of twee, want dit word per streek op ‘n gesentraliseerde plek gedoen. Jy kan die Libby-stelsel aflaai op jou rekenaar by hierdie skakel https://www.microsoft.com/en-za/p/libby-by-overdrive/9p6g3tcr4hzr?activetab=pivot%3Aoverviewtab. Jy gebruik dan die nommer van jou biblioteekkaartjie om aan te teken op Libby. Ek het net een kaartjie geregistreer en dit laat my toe om drie boeke op ‘n slag uit te neem en nog drie op “hold” te plaas – dis vir die boeke wat nie onmiddellik beskikbaar is nie.

      • Dankie!

        Moet jy op jou rekenaar lees of kan jy op kindle lees?

        • HesterLeyNel

          Jy kan dit oordra op jou kindle of ipad volgens ons biblioteek. Dis ‘n .acsm file, met ander net ‘n teksboodskap wat ‘n skakel bevat na die EPUB file by die biblioteek. Ek kan ongelukkig nie toets hoe dit werk nie, want my kindle is gekoop in 2011. Dus horingoud en ek kan nie die verbinding maak nie. Ek sien nie kans om op my selfoon te lees nie en lees maar op my laptop. Sal begin spaar vir ‘n nuwe kindle.

  3. Mijn bibliotheekpas is weer verlengd.
    Iemand anders maakt hiervan gebruik.

    Zelf lees ik bijna niet meer.

    Zonnige groet,

  4. Hoe heerlik skryf jy nie oor hierdie puik boek nie! Jy kan gerus Jan Vermeulen se ander pryswennerjeugboeke ook probeer kry. Hierdie drie en sestigjarige tiener geniet dit net so!

    • HesterLeyNel

      Dankie Amanda, ek gaan kyk wat ek kan raakloop.

Leave a Reply

This site uses Akismet to reduce spam. Learn how your comment data is processed.

Theme by Anders Norén

Back to Top
%d bloggers like this: